Erronka hauei aurre egingo die: erakundearen iraunkortasuna, gizarte-eraldaketa, laguntzen pertsonalizazioa, garapen profesionala, eta aliantzak eta sareko lana

Hausnarketa estrategikoa egiteko prozesua amaituta, non gure interestaldeetako laurogei lagunek baino gehiagok hartu duten parte (adimen desgaitasuna duten pertsonak, senideak, profesionalak eta Bizkaiko Foru Aldundiko Gizarte Ekintza Sailaren ordezkariak), gure familien zuzendaritza-batzordeak 2024-2027 epealdirako Plan Estrategikoa onartu du.

Datozen lau urteotarako ezarritako hogei helburu nagusiek gure erronka hauei erantzungo diete: erakundearen iraunkortasuna, gizarte-eraldaketa, laguntzen pertsonalizazioa, garapen profesionala, eta aliantzak eta sareko lana. Hori guztia hogeita hamazortzi ekimenetan edo ekintzaplanetan hedatuko da.

Iraunkortasuna
Erakundearen iraunkortasunaren ezinbesteko alorrean, gure elkartea ren egonkortasuna, bideragarritasuna eta biziraupena bermatzeko, helburuak dira gastuen eta diru-sarreren arteko oreka berreskuratzea, hitzarmenetatik gizarte-itunerako trantsizioa aurreratzea, eraldaketa digitalean aurrera egitea eta kudeaketa-sistema ziurtatzea, gure misioa garatzen jarraitu ahal izateko.

Gizarte-eraldaketa
Gure helburu estrategiko nagusiari dagokionez, gizarte-eraldaketari, hain zuzen ere, adimen desgaitasuna duten pertsonen parte-hartzea areagotzeko lan egingo dugu, baita gure oinarri soziala sendotzeko eta handitzeko, irisgarritasun kognitiboan eta jarrera irisgarrietan aurrera egiteko, eta eskubideak baliatzea eta kalitatezko aisialdirako eskubidearen sustapena errazteko ere. Hori guztia ingurune komunitarioan adimen desgaitasuna duten pertsonen, familien eta boluntarioen parte-hartze soziala handituz.

Laguntzen pertsonalizazioa
Gainera, pertsona bakoitzaren eta bere bizi-proiektuaren neurrira eratutako laguntza-irtenbideak eskainiko ditugu, ematen ditugun laguntzak pertsonalizatzeko asmoz. Era berean, adimen desgaitasuna duten pertsonen profilen aniztasun gero eta handiagoari erantzungo diogu, parte-hartze sozialerako eta aisialdirako banakako erantzunak proposatuko ditugu, eta familien eskariari erantzuteko zerbitzu berriak eskainiko ditugu.

Garapen profesionala
Gure profesionalen kolektiboari dagokionez, gure helburuak izango dira konpromiso eta inplikazio handiagoa lortzea, gaitasunak eta prestakuntza hobetzea, hobekuntza- eta kudeaketa-taldeak bultzatzea, eta berrikuntza eta ezagutza partekatua sustatzea, gure trebetasunak hobetzeko eta adimen desgaitasuna duten pertsonentzako laguntza onenen zerbitzura jartzeko.

Aliantzak eta sareko lana
Eta beste entitate eta erakunde batzuekin dugun harremanaren esparruan, kogobernantzaren eta lankidetzaren alde egingo dugu, foru-erantzukizun publikoko gizartezerbitzuak emateari balio erantsi gehigarria eskainiko diogu, hirugarren sektoreko gainerako eragileekin lankidetzan jardungo dugu eta gure interes-taldeetan inpaktu soziala sortuko dugu.