Plena Inclusiónek M8aren kanpainak datuen eskasia eta informazio eskuragarriaren eta laguntza pertsonalizatuen beharra nabarmendu ditu

Emakumeen Nazioarteko Eguna dela eta, Plena Inclusiónek gure konfederazioak kanpaina bat abiarazi du, adimen desgaitasuna duten eta beren amatasunari erabakitzeko eskubidea aldarrikatzen duten emakumeek protagonizatuta. Kolektibo horrek ama-eginkizuna betetzeko gaitasuna zalantzan jartzen duten aurreiritzi eta estereotipoak pairatzen ditu. Eta berdintasunean aurrera egiteko funtsezko eskubide hori mugatzen duten baldintzatzailek daude.

Erabakitzeko eskubidea
Amatasunari eta adimen desgaitasuna duten emakumeei buruzko datu-eskasiak politika eta baliabide espezifikoak diseinatzea eragozten du. Horregatik, Plena Inclusiónek errealitate horren gaineko berariazko azterlanak eta ikerketak eskatzen ditu.

Era berean, sexu- eta ugalketa-osasunari eta amatasunari buruzko informazioa eta prestakuntza ulerterraza eskuragarri egotea aldarrikatzen du, erabakitzeko eskubidea benetakoa izan dadin bermatzeko (baliabideak eskuragarri daude Plena Inclusiónaren webgunean).

Eta adimen desgaitasuna duten emakumeentzako laguntza espezializatuak eta pertsonalizatuak ere erreibindikatzen ditu, bai haurdunaldian bai haurren hazkuntzarako.

“Ni feminista naiz”
Bestalde, Emakunderen aurtengo leloa ‘Ni feminista naiz – Feminismoa zurekin bat”da, foru aldundiekin eta Eudelekin batera sustatua. Hala, feminismoak gizarteari egiten dion ekarpena aldarrikatzen dute, eta berdintasunaren arloan lortutako aurrerapenei eta feminismoak eguneroko bizitzan dituen balioak eraldatzeko ahalmenari balioa ematen diete.

Askatasuna, aukera-berdintasuna, ongizatea, eskubideekiko eta aniztasunarekiko errespetua, ahalduntzea, hezkuntza, demokrazia, aliantzak eta mundua aldatzeko elkartasuna dira gizartea eraldatzeko ekarpen feminista gisa nabarmentzen diren gakoak. Eta horiek aldarrikatzeko deia egin du, feminismoan berretsiz eta publikoki “Ni feminista naiz” esanez.

Askotariko diskriminazioak
Desgaitasun intelektuala duten emakume, gazte eta neskatoen kasuan, diskriminazio anizkoitzei aurre egin behar dietenean, areagotu egiten dira emakumeen eta gizonen arteko desberdintasuna ukatzeak eta gizarte-zerbitzuak zalantzan jartzeak bat egiten duten egungo testuinguruaren ondorioak.